Caduang Martes : Santo Domingo, Malambis A Tau
ING CADUANG MARTES A DEVOCION ANTING PARANGAL CANG SANTO DOMINGO DE GUZMAN
"SANTO DOMINGO, MALAMBIS A TAU"
DALIT A PAMUCLAT: "LUMEN ECCLESIAE"
O Sulu ning Capulungan,
Talaturu ning Catutuan,
Sampaga ning Capanayan,
Marfil na ning Catapatan.
Ume yung tigtug bitasa,
Aguas de Sabiduría,
Talapanaral ning Gracia,
Caring Nuan yagum yu ke sa.
PAMAGMULA
V. O Dios, tinubud me + i Jesus ban akilala raca.
R. At tinubud me kecami ing kecang Espiritu ban macapibie-bie cami.
V. Binie me kecami i Santo Domingo ban lumacad cami king catutuam na ning Mayap a Balita.
R. Cambe nang Santa Catalina, ing talapamalangcas ampon ding banal a Dominicano a memun nang meuna kecatamu.
V. O Cristo Jesus, mantabe ca kecami cabang abayan mi la king panalangin.
R. Ipakit me kecami ing kecang pacalulu ampon cayapan ban apasiag mi ya ing Mayap a Balita ning Catutuan.
V. O Espiritu nang JesuCristo, capnuan mu cami king lugud antimo ing depatan mu cang Santo Domingo.
R. Ban ing catalaraun mu ampon capanayan idala neng mabie ing cayarian caniting misasagsag a yatu.
V. Aduan mi iti cabang gaganacan mi ya ing aus ming anting Dominicano.
R. Malliari ke sanang tutung micacapatad king metung at metung ampon king yatu.
V. Aduan mi iti e para caring sarili mi,
R. Nune ban paligayan raca, O Dios, mangga man king alang angga. Amen.
DALIT KANG SANTO DOMINGO
Santo Domingo, ipanalangin Mu kami,
Santo Domingo, ipanalangin Mu kami.
Santo Domingo, ipanalangin Mu kami,
Santo Domingo, ipanalangin Mu kami.
I. Bie mabandi at atinan
Iti yang kekang kebaitan
Para king Ginu sikuil Mu ngan
Penaral Me ing amanu,
Melili king katutuan
Kaya binalik mung pasibayu.
II. Mikakalukung pamanaral
Leukan pati king kababan At dalise kabanalan,
Penaral mu ing katutuan
Maslag kang tala
Migdalang tula king Iglesiang katawan na.
III. "Laudare, Benedicare,
Praedicare" kekang tuntunan.
At taung tinuki king tagimpan.
Talapanaral mitatag la't
Lugud kang Maria at
Rosaryong banal linaganap ya!
IV. Bie kalulu pinili mu,
Saupan lang mangailangan ketula mu Panusig king katawa't mayakayan
Pawang kekang paingulutan
Ban ing Ginung Jesus naman
yang ganap mung atukyan.
V. Maligayang Santo Domingo
ika sana ing apusan
Lugud king Dios migit king nanu man
Parang-tau 'lang lingapan
Ban ila man Ginu at layun aluguran.
VI. Malugud ming Santo Domingo,
O mal ming patulunan
King bie biniyagan piyalimbawanan
Saup mu kekeng pasalamatan King Ginung parati
at matula mu ke sa'ng ganakan.
PAMAMASANG IBAT KING MAYAP A BALITA AGPANG CANG SAN MATEO (09:35-37)
Leganasan no ngan delauan Jesus ding balen ampon ding barrios. Tinuru ya caring carelang sinagogas, penaral na ing mayap a balita ning cayarian at pepacayapan no ring sablang atin sakit ampon caramdaman. Panakit na caring dacal a tau, kelunusan na la,* uling balisa la at sure-sure, anti la mo uaring tupang alang pastul.* Inia ngana caring keang alagad, "Maragul ing palutan, dapot ditac la mu ring talapagobra.
DIKIL CANG SANTO DOMINGO
King mabilug a Catipunan king Caleruega, nganang Chrys McVey, 'Metagkil yang milua i Domingo ampon king dapat capamilatan ning danup king Palencia, ing maki-bale carin Toulouse, capamilatan ding bili ding mapilang babai carin Fanjeaux. Dapot e pa mu naman ita macapiganap caring keang pamanangis. Minagus la reti ibat king catuliran ning pacagising a espiritualidad a menakit caring sabla. Ing Catutuan ya ing catayang tanda ning Orden, e ing calasag an (anti ing pamanalastas ding aliua), nune ing pamanaruc. At papanatiling buclat caring mata ning metung ban atangalan na ngan ing pacapabiasa kea.'
CAYADUANAN
Para king icacayap ding kekeng capara,
- Saupan mu cami, O Guinu.
Para king keaus ming sumuyu king yatu,
- Saupan mu cami, O Guinu.
Para king capupusan ning pamisagsagan,
- Saupan mu cami, O Guinu.
Para king pangabuclat mi caisipan at pusu,
- Saupan mu cami, O Guinu.
Para king keaus ming paligayan daca,
- Saupan mu cami, O Guinu.
IBPA MI
PAMUPUS A PANALANGIN
O Guinung JesuCristo, tinubud me i Santo Domingo ban mantabe kecami king Catutuan ban apasiag mi ya caring sabla ing Mayap a Balita. Saupan mu caming malliaring tapat caring kecaming panalangin ampon masigasig king kecang Amanu. Magdala ya sanang capanayan ing pacalulu mi ampon capigaganacan caniting misasagsag a yatu. Saupan na ke sana ning cabiasnan da ri Santo Domingo ampon Santa Catalina ban malugud ming ipasiag ing Catutuan para king kecaming Capulungan. Pagcalaman mu caming sigasig para king catalaruan ampon sicanan ban malliaring tapat a patutu ning kecang lugud. Misundu ke sanang lumacad cambe nang Santo Domingo, cambe nang Santa Catalina, ampon ding sablang Dominicano a memun nang meuna kecami, ban malliari keng balayan ning banal mung pamanaral. Iti aduan mi king Cabanal-banalan nang Lagiung Jesus. Amen.
BENDISIUN
V. Ipanalangin yu cami, O Santo Domingo ampon icong sablang Banal a Dominicano.
R. Ban mangaintulid caming makirake king ligaya ning banal yung pamanaral king Mayap a Balita.
V. Bendisiunan naca tamu sana ning Dios layun palablaban no ring pusu tamu king lugud
R. Macapibie-bie tamu sana king Mayap a Balita king arapan ning Dios ampon ding capara tamu.
V. Purian taya ampon pasalamatan ing Dios.
R. Ngeni at mangga man king alang angga.
Mibalik king milabas a blog post:
Please also check the English version
Mayo 04, 2021
Binaldug na king Amanung Sisuan
Cirilio Socorro: Sale ning Capasngauan
Ning Barrio Laug, Balen ning Mexico
ning aguman ning DagísPisamban Kapampángan a midake at micalap para king casalesayan at devocionario anting parangal cang Santo Domingo de Guzman
Comments
Post a Comment