Catlung Martes : Santo Domingo, Magdulap King Catutuan

ING CATLUNG MARTES A DEVOCION ANTING PARANGAL CANG SANTO DOMINGO DE GUZMAN


Please check the English version:

"SANTO DOMINGO, MAGDULAP KING CATUTUAN"

DALIT A PAMUCLAT: "LUMEN ECCLESIAE"

O Sulu ning Capulungan,
Talaturu ning Catutuan,
Sampaga ning Capanayan,
Marfil na ning Catapatan.

Ume yung tigtug bitasa,
Aguas de Sabiduría,
Talapanaral ning Gracia,
Caring Nuan yagum yu ke sa.

PAMAGMULA
V. O Dios, tinubud me + i Jesus ban akilala raka.
R. At tinubud me kecami ing kecang Espiritu ban macapibie-bie cami.

V. Binie me kecami i Santo Domingo ban lumacad cami king catutuam na ning Mayap a Balita.
R. Cambe nang Santa Catalina, ing talapamalangcas ampon ding banal a Dominicano a memun nang meuna kecatamu.

V. O Cristo Jesus, mantabe ca kecami cabang abayan mi la king panalangin.
R. Ipakit me kecami ing kecang pacalulu ampon cayapan ban apasiag mi ya ing Mayap a Balita ning Catutuan.

V. O Espiritu nang JesuCristo, capnuan mu cami king lugud antimo ing depatan mu cang Santo Domingo.
R. Ban ing catalaraun mu ampon capanayan idala neng mabie ing cayarian caniting misasagsag a yatu.

V. Aduan mi iti cabang gaganacan mi ya ing aus ming anting Dominicano.
R. Malliari ke sanang tutung micacapatad king metung at metung ampon king yatu.

V. Aduan mi iti e para caring sarili mi,
R. Nune ban paligayan raca, O Dios, mangga man king alang angga. Amen.

DALIT KANG SANTO DOMINGO
Santo Domingo, ipanalangin Mu kami,
Santo Domingo, ipanalangin Mu kami.
Santo Domingo, ipanalangin Mu kami,
Santo Domingo, ipanalangin Mu kami.

I. Bie mabandi at atinan
Iti yang kekang kebaitan
Para king Ginu sikuil Mu ngan
Penaral Me ing amanu,
Melili king katutuan
Kaya binalik mung pasibayu.

II. Mikakalukung pamanaral
Leukan pati king kababan At dalise kabanalan,
Penaral mu ing katutuan
Maslag kang tala
Migdalang tula king Iglesiang katawan na.

III. "Laudare, Benedicare,
Praedicare" kekang tuntunan.
At taung tinuki king tagimpan.
Talapanaral mitatag la't
Lugud kang Maria at
Rosaryong banal linaganap ya!

IV. Bie kalulu pinili mu,
Saupan lang mangailangan ketula mu Panusig king katawa't mayakayan
Pawang kekang paingulutan
Ban ing Ginung Jesus naman
yang ganap mung atukyan.

V. Maligayang Santo Domingo
ika sana ing apusan
Lugud king Dios migit king nanu man
Parang-tau 'lang lingapan
Ban ila man Ginu at layun aluguran.

VI. Malugud ming Santo Domingo,
O mal ming patulunan
King bie biniyagan piyalimbawanan
Saup mu kekeng pasalamatan King Ginung parati
at matula mu ke sa'ng ganakan.

PAMAMASANG IBAT KING MAYAP A BALITA AGPANG CANG SAN MATEO (11:02-06)

Ngeni i Juan a Maminiag, a atiu king suculan, abalitan na ing daraptan nang Jesus, inia mitubud yang mapilan caring keang alagad, pepapuntan no cang Jesus ban icutang da caya, "Icayu na pu itang mipangacung datang, o cailangan ke pang manayang aliua?" "I Jesus nganang mekibat, "Magbalic cayu cang Juan at sabian yu caya ing kecong daramdaman at acakit; 'ding bulag manakit la, ding pile macalacad la, ding leprosos malilinis la, ding maclac maca ramdam la, at ding mete mipasublian lang mie, at ing mayap a balita tungcul king pamag-ari ning Dios mipanaral caring calulu; at nuan ya ing taung alang pamicacunu tungcul canacu!"

DIKIL CANG SANTO DOMINGO
Metung caring mangaranung salese nang Santo Domingo ya itang kecaban ning cabengiang pamitalamitam ra ning mapanariang maki-bale ming Toulouse. Mekiramdam ya at dimdam ne ing Dios king sanu pa mang aria ning maki-bale. Atiu king masolong pamakiramdan cambe ning pali a "pepacaluat caring carelang pamisabi" inia ing Espiritu ning Dios mibulalag ya king tau. Senayan ne ing disputatio o ing tabat a pamisabing makiramdam king sindi ning catutuan anggiang caring sasalungat a argumento ban yang matangal ing caganapan ning catutuan.

CAYADUANAN
Ban atalastas mi ing kecang caburian,
- Aslaganan mu cami, O Guinu.

Ban mantabe ke king catutuan,
- Aslaganan mu cami, O Guinu.

Ban masigasig mi yang ipanaral ing Mayap a. Balita,
- Aslaganan mu cami, O Guinu.

Ban macasuyu ke kecang mipnung catapatan,
- Aslaganan mu cami, O Guinu.

Ban ayapusan mi la ring pepanuanan mung Banal,
- Aslaganan mu cami, O Guinu.

IBPA MI

PAMUPUS A PANALANGIN
O Guinung JesuCristo, tinubud me i Santo Domingo ban mantabe kecami king Catutuan ban apasiag mi ya caring sabla ing Mayap a Balita. Saupan mu caming malliaring tapat caring kecaming panalangin ampon masigasig king kecang Amanu. Magdala ya sanang capanayan ing pacalulu mi ampon capigaganacan caniting misasagsag a yatu. Saupan na ke sana ning cabiasnan da ri Santo Domingo ampon Santa Catalina ban malugud ming ipasiag ing Catutuan para king kecaming Capulungan. Pagcalaman mu caming sigasig para king catalaruan ampon sicanan ban malliaring tapat a patutu ning kecang lugud. Misundu ke sanang lumacad cambe nang Santo Domingo, cambe nang Santa Catalina, ampon ding sablang Dominicano a memun nang meuna kecami, ban malliari keng balayan ning banal mung pamanaral. Iti aduan mi king Cabanal-banalan nang Lagiung Jesus. Amen.

BENDISIUN
V. Ipanalangin yu cami, O Santo Domingo ampon icong sablang Banal a Dominicano.
R. Ban mangaintulid caming makirake king ligaya ning banal yung pamanaral king Mayap a Balita.

V. Bendisiunan naca tamu sana ning Dios layun palablaban no ring pusu tamu king lugud 
R. Macapibie-bie tamu sana king Mayap a Balita king arapan ning Dios ampon ding capara tamu.

V. Purian taya ampon pasalamatan ing Dios.
R. Ngeni at mangga man king alang angga.






May 11, 2021
Binaldug na king Amanung Sisuan
Cirilio Socorro: Sale ning Capasngauan
Ning Barrio Laug, Balen ning Mexico
ning aguman ning DagísPisamban Kapampángan a midake at micalap para king casalesayan at devocionario anting parangal cang Santo Domingo de Guzman



Comments

Post a Comment

Popular Posts