Capitung Martes: Santo Domingo, Ing Masayang Frayle

ING CAPITUNG MARTES A DEVOCION ANTING PARANGAL CANG SANTO DOMINGO DE GUZMAN

"SANTO DOMINGO: ING MASAYANG FRAYLE"

DALIT A PAMUCLAT: "LUMEN ECCLESIAE"

O Sulu ning Capulungan,

Talaturu ning Catutuan,

Sampaga ning Capanayan,

Marfil na ning Catapatan.

Ume yung tigtug bitasa,

Aguas de Sabiduría,

Talapanaral ning Gracia,

Caring Nuan yagum yu ke sa.

PAMAGMULA

V. O Dios, tinubud me + i Jesus ban akilala raka.

R. At tinubud me kecami ing kecang Espiritu ban macapibie-bie cami.

V. Binie me kecami i Santo Domingo ban lumacad cami king catutuam na ning Mayap a Balita.

R. Cambe nang Santa Catalina, ing talapamalangcas ampon ding banal a Dominicano a memun nang meuna kecatamu.

V. O Cristo Jesus, mantabe ca kecami cabang abayan mi la king panalangin.

R. Ipakit me kecami ing kecang pacalulu ampon cayapan ban apasiag mi ya ing Mayap a Balita ning Catutuan.

V. O Espiritu nang JesuCristo, capnuan mu cami king lugud antimo ing depatan mu cang Santo Domingo.

R. Ban ing catalaraun mu ampon capanayan idala neng mabie ing cayarian caniting misasagsag a yatu.

V. Aduan mi iti cabang gaganacan mi ya ing aus ming anting Dominicano.

R. Malliari ke sanang tutung micacapatad king metung at metung ampon king yatu.

V. Aduan mi iti e para caring sarili mi,

R. Nune ban paligayan raca, O Dios, mangga man king alang angga. Amen.

DALIT KANG SANTO DOMINGO

Santo Domingo, ipanalangin Mu kami,

Santo Domingo, ipanalangin Mu kami.

Santo Domingo, ipanalangin Mu kami,

Santo Domingo, ipanalangin Mu kami.

I. Bie mabandi at atinan

Iti yang kekang kebaitan

Para king Ginu sikuil Mu ngan

Penaral Me ing amanu,

Melili king katutuan

Kaya binalik mung pasibayu.

II. Mikakalukung pamanaral

Leukan pati king kababan At dalise kabanalan,

Penaral mu ing katutuan

Maslag kang tala

Migdalang tula king Iglesiang katawan na.

III. "Laudare, Benedicare,

Praedicare" kekang tuntunan.

At taung tinuki king tagimpan.

Talapanaral mitatag la't

Lugud kang Maria at

Rosaryong banal linaganap ya!

IV. Bie kalulu pinili mu,

Saupan lang mangailangan ketula mu Panusig king katawa't mayakayan

Pawang kekang paingulutan

Ban ing Ginung Jesus naman

yang ganap mung atukyan.

V. Maligayang Santo Domingo

ika sana ing apusan

Lugud king Dios migit king nanu man

Parang-tau 'lang lingapan

Ban ila man Ginu at layun aluguran.

VI. Malugud ming Santo Domingo,

O mal ming patulunan

King bie biniyagan piyalimbawanan

Saup mu kekeng pasalamatan King Ginung parati

at matula mu ke sa'ng ganakan.

PAMAMASA (Dapat 2: I- 4)

DIKIL CANG SANTO DOMINGO

Angga king sepu ning bie nang Santi Domingo menatili yang alang pegalang talaturu, darake mangacabang oras cabang maglacbe, makitalamitan king ninu mang macasadiang makiramdam kea taruc da man o ali ing keang amanu. Talastas dang matula ding keang capatad ing pamanantabeng binie na capamilatan ning pamanalangin na para carela, ampon capamilatan ning mapali nang lugud at matulang pamanantabe, lacuas na, capamilatan ning pamisadsad nang magiag carelang e magdatun king camistulan ding caburiang sidia ra para caring carelang sarili.

CAYADUANAN

Para king icacayap ding kekeng capara,

- Saupan mu cami, O Guinu.

Para king keaus ming sumuyu king yatu,

- Saupan mu cami, O Guinu.

Para king capupusan ning pamisagsagan,

- Saupan mu cami, O Guinu.

Para king pangabuclat mi caisipan at pusu,

- Saupan mu cami, O Guinu.

Para king keaus ming paligayan daca,

- Saupan mu cami, O Guinu.

IBPA MI

PAMUPUS A PANALANGIN

O Guinung JesuCristo, tinubud me i Santo Domingo ban mantabe kecami king Catutuan ban apasiag mi ya caring sabla ing Mayap a Balita. Saupan mu caming malliaring tapat caring kecaming panalangin ampon masigasig king kecang Amanu. Magdala ya sanang capanayan ing pacalulu mi ampon capigaganacan caniting misasagsag a yatu. Saupan na ke sana ning cabiasnan da ri Santo Domingo ampon Santa Catalina ban malugud ming ipasiag ing Catutuan para king kecaming Capulungan. Pagcalaman mu caming sigasig para king catalaruan ampon sicanan ban malliaring tapat a patutu ning kecang lugud. Misundu ke sanang lumacad cambe nang Santo Domingo, cambe nang Santa Catalina, ampon ding sablang Dominicano a memun nang meuna kecami, ban malliari keng balayan ning banal mung pamanaral. Iti aduan mi king Cabanal-banalan nang Lagiung Jesus. Amen.

BENDISIUN

V. Ipanalangin yu cami, O Santo Domingo ampon icong sablang Banal a Dominicano.

R. Ban mangaintulid caming makirake king ligaya ning banal yung pamanaral king Mayap a Balita.

V. Bendisiunan naca tamu sana ning Dios layun palablaban no ring pusu tamu king lugud 

R. Macapibie-bie tamu sana king Mayap a Balita king arapan ning Dios ampon ding capara tamu.

V. Purian taya ampon pasalamatan ing Dios.

R. Ngeni at mangga man king alang angga.

#SaintDominic #15TuesdayDevotion #ApungInggu